Gabaygan
oo uu tiriyay abwaan Jaamac-bile Cismaan taariikhdu markay ahayd 4/1/2019
sida magaciisa “Xisaab Maqan” laga dhadhansan karo waxa uu ku saabsan
yahay afar arrimood iyo qodob shanaad oo ah rajo abuur iyo jihaynta reer SSC.
Qodobbadu
waxa ay kala yihiin
1. Waxgalka
Soomaaliyeed ee marka reer SSC deegaankooda u qalab qaataan in ay ka didiyaan
Soomaali-diidka yidhaahda dhiig Soomaaliyeed yaan la daadin iyaga oo garab u ah
gardarro doonka sababtoo ah, qofkii dhex-dhexaad ka noqdo laba qof oo is haya
waxa uu la jiraa gardarraalaha.
2. Dadka
yidhaahda qabyaalad baad uga jeeddaa gabayada aad dadkaa ku guubaabinayso
3. Hagrashada
dawladda Soomaaliya ku hayso dadka reer SSC iyada oo reer SSC ay isu xil
saareen ee ah shaqada ugu wayn ee dawladda Soomaaliyeed looga baahnaa in ay ka
shaqayso, balse taas baddalkeeda ay dawladda Soomaaliya naasnuujin u samayso
Soomaali-diidka.
4. Hagrashada
iyo Hoosaasinta ay maamulka Puntland ku hayeen dadaalladii kala duwanaa ee
loosoo maray midaynta dadka reer SSC.
5. Ugu
dambayn abwaanku waxa uu muujinayaa sida dadka reer Puntland iyo reer SSC aysan
u kala maarmin ayna mar uun iyaga oo walaalo ah bulsho ahaan midoobayaan
deegaanka SSC-na uu soo galayo gacanta reer SSC iyada oo bulshada reer
Puntland-na ay ka qayb qaadan doonaan halgankaas.
Xisaab Maqan 4/1/2019
- Murti gabay ah maansiyo tiraab miidda geeraarka
- Mucda faallo maashee tiraab hadallo miisaaman
- Maan tuujis meegaar abwaan mahadho suugaan ah
- Maax shubanta maahmaah cuddoon maamin iyo sheegid
- Tix la mahadsho maamulidda gabay maanyo tirinteeda
- Madadaalo uma aanan odhan maarashiyo tookhe
- Marinkiisa waan toosiyaa maara-waaga ahe
- Afgarooc ha maagmaago ama maansa booligu
- Marraa waa xid suugaantu waa meeriskaan idhiye
- Maqaawiirtii Soomaalidiyo miiddii baan ahaye
- Sida madida hoobaan ayaan soo maggaabaaye
- Ma huraan naflaa’igu kolkaan meeristeed galo’ e
- Mudda dheer gablool baan ahaan maaqurraan kicin
- Xalay baan mirkacay oo hurdiyo maagay jiifkiiye
- Maankiina galiyoo tixdaa meelkastaba geeya
- Madashaa Garoowiyo Nugaal hawdka marinsiiya
- Mudug iyo sanaag iyo xadeed uunka maqashiiya
- Xeelliga ha meeraysatee mooska bariga geeya
- Cidna yaanay moogaanin waa mahadho suugaane
- Haddii aan intaa meeriyoo marag usii yeelo
- Alleylehe mid loo guuxay baan maandhe sheegaaye
- Muska bari manjaha koonfureed, maaxda buuhoodle
- Maaggeeda soomaali way minan wadaagtaaye
- Kala maarmimaysoo waqeed waysu muhataaye
- Malko qudha mareeg kaliya bay maandhow leedahaye
- Muuqeeda meeshay gashiyo magaca sooyaalka
- Inay meel u wada jeesataan maamiyaa abid
- Miscil qudha inay leedahaan maanka ku hayaaye
- Hayeeshee mas’alo taaganoo maangalaan odhane
- Mashaqada dhexdeena ah kolkii magantu aynfaado
- Nabad lagu macaashiyo kolkii mudantu naafawdo
- Xadhiggii marooqsamay hadduu meelna qaban waayo
- Runta lagama maarmee kolkaa way macaantahaye
- Miskiin iyo midkii daalimiyo meehanaw tuuga
- Maaleeyo kii qooshay waa laga maroojaaye
- Midkii micigabaarrey wadaa laga majiiraaye
- Kolkaasaa maslaxo dhalanaysaa lagu macaashaaye
- Mihiibtiisa kii laga dhacana maalkii wuu heliye
- Arartaasi waa mihindis iyo mahadhadaydiiye
- Milge gabay murtidii laygu habay waa Mullaaxdii
- Mas’aliyo muraad dihin haddaan idin magaabsiiyo
- Kala madhidda kala miiriddiyo meelo kala gaynta
- Mid dhawaynta minan goosadkiyo kala masaafaynta
- Qabiil maagga reer magansigiyo qaar miciinsiinta
- Mareeg xidhadka mudan sheegashada muuqashada faanka
- Mariid qooshka midab sooca iyo kala mihiibsiinta
- Midnimaan ka doorbiday inaan milil u dooxaaye
- Hayeeshee madluumkii dulmiga lagu malaandeeyay
- Nin la mooraduugiyo miskiin maalkii laga qaaday
- Mid aan muuq aqaaniyo midkii magaca ii sheegta
- Mid ii dhow midkii meel fog iyo maylal ii jooga
- Maldaha iyo maagmaagashiyo moosiddiyo beenta
- Kuma meehanaabee xaqaan meel lagayaaye
- Madax iyo mas’uulkii ah iyo kii la maamulayo
- Runtaan ugu miciinaa dhammaan maalin iyo layle
- Masalka iyo maragaygu waa meeriskaan idhiye
- Manqixiyo murtida gabayga waan kuu malmalayaaye
- Maskaxda iyo maankaba gashoo gole u maageera
- Dal masaynta midow doonka iyo meel isugu keenka
- Maxas korinta maatada dayacan milic kasoo awdka
- Milgo doonka milil tuurka iyo sharaf masaalaynta
- Gar masaynta meehaal filadka iyo midig walaalaynta
- Marti soor magool bixinta iyo maanic kala saarka
- Anigaa u miiggane xilkaa maahir waa gabay’ e
- Kii lagu majeertiyo waxaa moosay odaygii
- Muraadkiisii buu dhowrayaa inuu maggaabshaa
- Muska iyo miscilishayda iyo minanka aan joogo
- Manno laguma qabo hawsha aan saaray madaxayga
- Mashaqiyo mur deebaaqa iyo mayllimo afaysan
- Dushayday ka mawlaynasaa micigabaarrey
- Midow doonka soomaaliyeed mayllin igu reeb
- Manno kagama sugo iyo inay madhax isiiyaan’e
- Masaartiyo mindida iyo kolkaan waranka miisaamo
- Manjo qabasho madax goyn ayay igu malooqaan
- Midnimada ninkii loo diree loo madiixaayay
- Tafaraaruq kii maaggan buu midigta saaraa
- Mutuxaadda is maqiiqa iyo milil dhunkaal siinta
- Makri falidda miil dooxashada marin habaabsiinta
- Maxaadh galinta midaw diidka iyo qaar mihiibsiinta
- Moohaar bixinta moroh jeexa iyo qaar maggaabsiinta
- Malmal qooshka malax iyo dhunkaal malabku sheegeedda
- Miciin beena milgo tiridda iyo maagiddiyo tookha
- Misbaax tiridda mood guradka iyo moorif siinteeda
- Midow diidka kala mooska iyo meelo kala gaynta
- Ma mooggani muskaa bari siduu ii mahoobiyaye
- Walaaluhuna ma kala maarmayaan magan Ilaahay e
- Midnimada kuwii curin lahaa maalin la arkee
- Mar haddaanan madaxwayne iyo mudane ii joogin
- Matalaad wasiir iyo haddii madaxna aan waayay
- Dhallinyaradu waa inay midnimo muujiyaan cudud
- Isimmada la maamuusay ee aan milgaha saaray
- Waa inay masiirkii bulshada madhax u yeelaan
- Oo ay cadaawaha ku mamay dhiigga mudantayda
- Waa inay muquunniyo awood madal u yeelaan
- Millatari dagaallami yaqaan maalin lays galay
- Maarayn wasaariyo wixii maamul dawlo ah
- Waa inay hoggaan maaro leh oo miiggan dooraan
- Haddii aan intaa muujiyay oo mayga ka caddeeyay
- Waxba yaan mas’uul baad tihiin lay maqmaqashiin
- Waxba yaan maqaawiir cuddoon maanka lay galin
- Muusanawga beenta ahna yaan laygu malafsiin
- Guryo wada muraayadana yaan laygu meelayne
- Meecaad Ilaahay baxsho iyo mawle amarkiisa
- Mar uun baan is wada muujinoo meel u wada jeesan
- Malko qudha intaan jeexdo baan qaadayaa marin
- Ninkastana siduu ii makalay waa xisaab maqan!!!!!!